Bizimlə əlaqə

Müsahibə

ABŞ-da yaşayan azərbaycanlı alim: `Dünyanı robotlar idarə edəcək` (ÖZƏL-MÜSAHİBƏ)

Yayımlandı

da

-NASA-da iki həftə ərzində 80 saat işləyirdim.

Hafiztimes.com un müsahibi NASA kimi nüfuzlu qurumda çalışmış azərbaycanlı gənc alim Teymur Sadıxovdur. Aerokosmik mühəndislik üzrə fəlsəfə elmləri doktoru olan Teymur Sadıxov hazırda Amerikada “Mercedes-Benz” şirkətinin elmi-tətqiqat mərkəzində baş mühədis işləyir. Teymur Sadıxov bu yaxınlarda Müdafiə Sənayesi Nazirliyinin xüsusi dəvəti ilə Azərbaycana gəlib və “ADEX-2016” sərgisində iştirak edib.

Bakıya səfəri zamanı Teymur Sadıxov suallarımızı cavablandırıb.

– “ADEX-2016” sərgisindən razı qaldınızmı?

-Əlbəttə, razı qaldım. Burada seminarlarım, maraqlı görüşlərim oldu. İsraillə birlikdə Azərbaycanda dronların istehsal edildiyini gördüm. Həqiqətən də inkişaf hiss olunur. Zənnimcə, gələcək robotların əlindədir. Müdafiə sektorunda robotlardan istifadə etməyən ölkələr geridə qalmış hesab olunur. Amerika bu sahəyə böyük investisiyalar yatırır. Əgər robotlardan istifadə edilərsə, hər şey daha asan başa gələcək, insan həyatı qorunacaq. Azərbaycanda bu istiqamətdə inkişaf hiss olunur.

Qeyd edim ki, robotların hazırlanması üçün həddindən artıq investisiya tələb olunur. Bu, ölkənin tələbatına və investisiyanın məbləğənə bağlıdır. Fikrimcə, bütün pulu bu sahəyə yatırmaq düzgün deyil. Burada əsas məqsəd insan faktorunu robotla əvəz etməkdir. Hesab edirəm ki, dünyanı robotlar idarə edəcək.

Hər il Amerikada 30 min insan yol qəzasında həlak olur. Bunların çoxu insanların səhvlərinə görə baş verir. İnsan faktorunu bir kənara qoyub robortlara üstünlük versək, onların həyatlarını xilas etmiş olacağıq. Qoca və xəstə insanlara yardım etmək üçün də robotlardan istifadə etmək olar.

– Yeni texnologiyaların müharibə, döyüş vəziyyətlərində üstünlükləri nədən ibarətdir?

-Hazırda texnologiya dövrüdür. Müharibə şəraitində uzaqdan idarə olunan dronlardan istifadə olunur. Bu aparatların böyük üstünlükləri var.

-Təhsilinizlə bağlı danışmaq istərdik.

– Bakıda 211 saylı orta məktəbi əla qiymətlərlə bitirmişəm. Daha sonra TCS (Türkiyə Cümhuriyyəti Sınavları) imtahanı ilə Türkiyə universitetinə qəbul olmuşdum. İstanbul Texniki Universitetindən Təyyarə Mühəndisliyi ixtisası üzrə bakalavr dərəcəsiylə universitet birincisi olaraq məzun olmuşam.

Bundan başqa universitetin 1773-cü ildə qurulmasından etibarən 4.00 üzərindən 4.00 ortalama qiymətlə məzun olan ilk tələbə olaraq tarixə düşmüşəm.

Nəticədə dünyanın ən yüksək reytinqli mühəndislik və texnologiya ali məktəblərinə bakalavr sonrası təhsilə qəbul oldum. Müraciət etdiyim 10 ali məktəbin 10-na təqaüdlü əsaslarla daxil ola bildim. Bunlar Purdue University West Lafayette, Massachusetts Institute of Technology, University of Texas at Austin, University of Minnesota Twin Cities, University of Maryland College Park, University of Michigan Ann Arbor, Virginia Tech-di, University of California San Diego, Stanford University, University of Illinois at Urbana Champaigndır.

2008-ci ilin sentyabrında Kaliforniya Universiteti San Diego-nun Mexanika və Aerokosmik Mühəndislik fakültəsində Powell Fondu təqaüdçüsü olaraq elmi təhsilə başlamışam. 2010-cu ilin iyun ayında əla qiymətlərlə Mühəndislik Elmləri, Mexanika Mühəndisliyi ixtisasının magistr dərəcəsi üzrə məzunam. 2010-cu ildə ABŞ-ın ən böyük və yüksək reytinqli Aerokosmik Mühəndisliyi fakültəsinə malik Corciya Texnologiya İnstitutunun Aerokosmik Mühəndisliyi fakültəsində təhsilimi davam etdirdim. Hazırda aerokosmik mühəndislik üzrə fəlsəfə eləmlər doktoruyam.

– Bildiyimiz kimi hazırda “Mercedes-Benz” şirkətində çalışırsınız. Orada işiniz nədən ibarətdir?

– Bəli, hazırda gördüyümüz iş elmi-tətqiqatdır. Kamera və radarlardan istifadə edərək ətraf mühitdən informasiyanı toplayıb və bununla maşın üzərində planlama edirik. Bu, o deməkdir ki, insanları sükan arxasından uzaqlaşdırıb, maşını robotlarla idarə etmək istəyirik. Mənim əsas gördüyüm iş trayektoriyanın və ümumilikdə planlamanı hesablamaqdır. Məsələn, maşının yolda öz xətti ilə getməsi, digərləri ilə ara məsafənin saxlanması, işıqforlarda maşının dayanması və s. Bunların hamısını bizim komanda yerinə yetirir. Bu maşınlar dünyanı heyrətə gətirəcək.

– Bu istiqamətə fəaliyyətinizi Azərbaycanda davam etdirmək istərdinizmi?

-Hər şey Azərbaycanın istəyindən aslıdır. Təbii ki, mənim kariyera istəyim də vacibdir. Hazırda bilmirəm ki, Azərbaycan bu işlərə nə qədər investisya yatırmaq istəyir. Amma mümkün olsa, fikirləşmək olar.

-Bir müddət NASA-da işləmisiniz. Bu, Azərbaycan vətəndaşı üçün böyük uğurdur.

-NASA-da elmi araşdırmaçı kimi çalışırdım. NASA-ya keçidim universitetlə əlaqəli olub. 2013-cü ildə Sikorski vertolyotlarında özü-özünə idarə olunan vertolyotlar üzərində işləyirdim. Bu, Konnektikut ştatında yerləşir. Daha sonra 2014-cü ilin yayında NASA-dan bir neçə nəfər bizim universitetə müraciət etdi. Bizim fakültə dünyada aerokosmik mühəndislik üzrə ən böyük departament sayılır. Dedilər ki, bizə kömək lazımdır və sizin məsləhət görə biləcəyiniz tələbələr varmı? Bir neçə professor məni məsləhət gördü və beləliklə NASA-da işə başladım. Bir neçə layihə var idi, xoşuma gəldi və mən orada çalışmağa başladım. Orada bir neçə layihə vardı. Onlardan biri Amerikan Donanması ilə birgə layihə idi. Donanmanın “Hummer”lərinin plitosuzlaşdırılması layihənin əsas məqsədi idi. Həm şəhərdə, həm də şəhərdən kənarda pilotsuz idarə olunun “Hummer”lərin hərəkəti üzərində çalışdım. Beləliklə, aerokosmik mühəndislikdən yer üzərindəki robotlara keçdim. Bu işi sevdiyim üçün daha sonra “Mercedes –Benz” şirkətinə transfer oldum.

-NASA-da iş rejiminiz necə idi? Sizdən nələr tələb olunurdu?

-Bizim işimiz robotik sistemlərlə bağlı idi. Orada işləmək üçün robotlarla bağlı təcrübənin olması, bu sahə üzrə ekspert olmaq vacibdir. “Mercedes-Benz”də isə pilotsuz idarə olunan maşınlar üzərində işləyirik. Normalda iş rejimi həftədə 40 saatdır. NASA-da iki həftə ərzində 80 saat işləyirdim.

-Orada sizdən başqa Azərbaycanlı var idi?

-Sözün açığı, mənim rastıma çıxmayıb.

-NASA deyəndə kosmik səma cisimləri nəzərdə tutulur.

-Mənim layihələrimin bəziləri kosmik fəaliyyətlələrə bağlı idi. Bu barədə çox məlumat verə bilmərəm. Qeyd edə bilərəm ki, bu, daha çox Mars üzərindəki kosmik robotlarla bağlı idi. Həmin kosmik robortlarla əlaqədar müəyyən tətqiqatlarım olub.

-Marsda canlı həyatın olub-olmaması haqda müzakirələr gedir. Sizin necə düşünürsünüz?

-Hazırda Marsda chəyatın olduğu sübut olunmayıb. Elmi sübut yoxdur. Demək ki, orada heç bir həyat da yoxdur. Belə məlumatlara inanmaq düzgün deyil. Marsdan əldə edilən məlumatlara fiziklər, bioloqlar baxırlar. Biz isə robortlarla işləyirdik. Əlbəttə, biz Marsda insan tapa bilmərik. Curiosity adlı robot Marsa bizim labarotoriyamız tərəfindən göndərilib.

– Pilotsuz idarə olunan avtomobillərin təqdimatı nə zaman olacaq?

-Hazırda biz elmi tətqiqat işlərini davam etdiririk. Açıq yollarda həmin avtomobilləri test edirik. Satış ən azı 4-5 il sonra mümkün olacaq.

-Həmin maşınlar Azərbaycana da satılacaqmı?

-Bizə yol xəritəsi haqqında dəqiq məlumat lazımdır. Əvvəlcə buranın yolları barədə dəqiq xəritəni çıxarmalıyıq. Bundan sonra mümkün ola bilər.

-Bizim yollar həmin avtomillərin idarə olunması üçün uyğun deyil?

-Yollara müəyyən xətlər çəkilməli və yol nişanları quraşdırılmalıdır. İnsanların sürücülük səviyyələri də yüksək olmalıdır. Bəzən sürücülər düz xətlərin üzərində sürürlər. Bu da robotların görməsinə maeə ola bilər. Biz çalışırıq ki, həmin maşınlar bütün şəraitlərdə özlərini idarə edə bilsinlər.

-Qiymətlər bəllidirmi?

-Hazırda qiymətlər müəyyən edilməyib. Yəqin k, yüksək olacaq.

– Yəqin ki, siz də həmin avtomobillərdən istifadə edəcəksiniz

-Hazırda istifadə etdiyim “Mercedes” maşınında yalnız magistral yollarda sürücüsüz idarə etmə funksiyası var. Öz-özünə sürmə qarşıda olan maşınla ara məsafəni saxlamaq və xətt üzərində getməkdir. Şəhərdə bunu etmək asan deyil. Çünki şəhərdə həddindən çox qaydalara əməl etmək lazımdır.

-Başqa şirkətlərdən iş təklifləri alırsınızmı?

– Mən Silikon Vadisində işləyirəm. İşlə bağlı həddindən çox təklif alıram. Mühəndislik, pilotsuz maşınlar hazırda ən məşhur sahədir.

– İş yeri seçərkən nəyə üstünlük verirsiniz, yüksək maaşa, yoxsa,..?

-Fikirimcə, perspektiv baxımından həm kariyera, həm də maddi dəstək yaxşı olmalıdır. Hə ikisini də nəzərə alıram.

-Gələcəkdə öz şirkətinizi qurmaq istərdinizmi?

-Bunu sabah da edə bilərəm. Amma əvvəlcədən heç bir plan qurmuram. Ola bilsin ki, yaradacağım şirkət öz-özünə idarə olunan maşınlar və ya paketləri dağıdan poçt maşınları istehsal edəcək. “Humanoid” robotlar yaratmaq da mümkün ola bilər.

-Bu sahədə sizdən başqa azərbaycanlı varmı?

– Sözün açığı mən bu sahədə Azərbaycan heç kimi tanımıram. Təyyarə mühəndsiliyindən tutmuş robot hazırlamağa qədər müxtəlif sahələrdə işləmişəm, amma azərbaycanlıya rast gəlməmişəm.

– İş təkliflərinin çox olduğunu bildirdiniz. Hansı məşhur şirkətlərə “yox” demisiniz?

-Onların adını çəkmək düzgün olmaz. Hələ də təkliflər var. Xoşuma gələn layihə olsa, iş yerimi dəyişmək haqda düşünə bilərəm. Hazırda belə planım yoxdur.

-Sevindirici haldır ki, bir azərbaycanlı ölkə hüquqlarından kənarda böyük uğurlara imza atıb. Buna necə nail oldunuz?

-Motivasiya varsa, uğur qazanmaq asandır. İlk növbədə işə sevgi, qayğı ilə yanaşmaq lazımdır.

– Bu pilləri aşmaq üçün sizə kimlər dəstək olub?

-Mən həmişə dövlət məktəblərində təhsil almışam. Türkiyədə təhsilim Türkiyə Cümhuriyyətləri Sınavı (TCS) ilə bağlı idi. Bu da ödənişsiz təhsildir. Həm Türkiyə, həm də Azərbaycan dövlətindən təqaüd alırdım. Kaliforniya Universiteti San Diego-nun Mexanika və Aerokosmik Mühəndislik fakültəsində Powell Fondunun təqaüdçüsü olmuşam. Doktorantura təhsilim Amerikan Hava Qüvvələri Elmi Tədqiqat Ofisi (AFOSR) və NASA Dryden (yeni adı Armstrong) Uçuş Tədqiqat Mərkəzinin qrantları ilə maliyyələşdirilib. Təbii ki, Amerikada və Türkiyədə oxuduğum zamanlarda başqa yerlərdən də təqaüdlər alırdım. Yaxşı oxuyan tələbə üçün hər tərəfdə “yaşıl işıq” yandırılır.
Etiraf edim ki, təhsilə pul xərcləməmişəm və buna qarşıyam. Özəl məktəblərin tərəfdarı deyiləm. Güclü dövlət məktəbləri mövcuddur. İstədiyinizi orada əldə edə bilərsiniz.

-Necə bir ailədə böyümsünüz?

-Normal azərbaycanlı ailəsində böyümüşəm. Anam əvvəl bağça müəlliməsi işləyib. Sonra bağçada müdir köməkçisi olub. Atam Energetika İnsititunda işləyib.

– Xaricdə təhsil alan gənc olaraq ölkəmizin təhsil sistemini necə qiymətləndirirsiniz?

– Azərbaycanda yaxşı universitetlər var. Məncə, bakalavr səviyyəsini yüksəltmək çətin iş deyil. Yaxşı müəllim və bir az da investisiya ilə bakalavrların bilik səviyyəsini yüksəltmək olar. Bakalavrdan sonrakı təhsili artırmaq isə bir az çətindir. Çünki burada elmi-tətqiqat əsasdır. Bunun üçün həddindən çox investisiya lazımdır. Bu baxımdan Avropa daxil olmalaq bir çox ölkələrdən gənclər əlavə təhsil almaq üçün Amerikaya üz tuturlar. Amerikada elmi-tətqiqat sahəsi inkişaf edib.

– Hədəfləriniz nədən ibarətdir?

– Bir müddət öz-özünə idarə olunan texnologiyalar üzərində işləyəcəyəm. Hansı şirkətlərə gedəcəyim bilinmir. İş yerimi tez-tez dəyişə bilərəm. Humanoid robotlar üzərində işimi davam etdirməyi düşünürəm.

-Dövlət hesabına xaricdə təhsil alan gənclərin ölkəyə qayıtmasından problem yaşanır. Sizcə, gənclər niyə qayıtmaq istəmirlər?

-Bu barədə fikirlərimi Təhsil Naziliriyinə də bildirmişəm. Bizdə tələbəni bakalavr və magist təhsili üçün Amerikaya və ya başqa ölkələrə göndərirlər. Xeyli məbləğdə pullar xərcləyirlər. Sonra həmin tələbələr geri qayıtmır. Təqribən bir magistri Amerikaya göndərmək üçün dövlət təxminən 200 min dollar xərcləyir. Magistr təhsili uzun müddətli deyil. Məncə, təhsil üçün bir il ərzində 50 min dollar xərcləmək çox böyük puldur. Hesab edirəm ki, bu pulu Azərbaycan təhsilinin inkişafına yönəltmək lazımdır. Müəllimlərin maaşını artırmaq da bura daxildir.
Hazırda təhsildə inkişaf gedir. ADA, Qafqaz və Bakı Ali Neft Məktəbində ali təhsilin keyfiyyəti yüksəkdir.

– Müvəqqəti də olsa Bakıdasınız. Paytaxtda nələr dəyişib?

-Bakı tamam dəyişib, şəhər inkişaf edir. Diqqətimi çəkən məqam sürücülərdir. Əvvəlki illərlə müqayisədə nisbətən sürücülük mədəniyyəti formalaşıb. Bakı gözəlləşib. Çox istərdim ki, insaların həyat şəraiti, təhsili daha yaxşı olsun. Bu istiqamətdə uğurlu addımların atıldığının şahidi oldum.
Amerikada orta səviyyəli və həddindən artıq varlı insanlar yaşayır. Mən orta səviyyəli insanların üst pilləsində dururam. Orada mühəndislər orta təbəqə sayılır. Normal həyat yaşayıram.

-Ailəlisinizmi?

-Mən konsevativ insan deyiləm. Liberalam. 18 yaşdan sonra uşağa bir az azadlıq vermək lazımdır. Mən 16 yaşımdan evdən çıxmışam. Şükür Allaha, heç bir problem olmayıb. Amerika və Azərbaycan buna görə çox fərqlənir. Amerikada uşaqlar 15 yaşından işləməyə başlayırlar. Onlar valideyndən aslı olmurlar. Azərbaycanda ailə bağları möhkəmdir. Bəzən buna görə başqalarının hüquqları tapdanır. Bu, düzgün deyil.

-Amerikda yaxın dostlarınız varmı?

– Azərbaycanlı dostlarım çoxdur. Amerikalı və alman dostlarım da var. Məncə, əsl dost sadiq olmalıdır. Lazım olanda yanında olmalıdır.

-Donald Tramp, yoxsa Hillary Klinton?

-Hazırda Amerika vətəndaşı deyiləm. Buna görə səs vermə hüququm yoxdur. Dəstəklədiyim liberal namizdə olacaq. Bu da Hillari Klintondur.

-Tampın müsəlmanlara qarşı səsləndirdiyi fikirlərə münasibətiniz necədir? Müsəlman olduğunuza görə sizi qınayanlar olurmu?

– Amerikada müsəlman olduğum üçün pis münasibət görməmişəm. Cənub ştatlarda belə hallar ola bilər. Tramp sadəcə danışmağı bacarır. O, vaxtilə özünə demokrat deyirdi, indi isə respublikaçı olub. Trampın prezident seçiləcəyinə inanmıram. O, prezidentliyə hazır deyil.

– “Mercedes-Benz”in baş mühəndisi Bakıda maşın sürə bilirmi?

– Bakıda maşın sürməyi tərgitmişəm. Əsəblərimi korlamaq istəmirəm. Amerikada maşın sürmək daha rahatdır. Burada vəziyyət fərqlidr.

Hafiz Əhmədov

 

Müsahibə

Samir Sadıxovun son layihəsi (FOTOLAR)

Yayımlandı

da

Tərəfindən

“Bu avtomobili evdə, boş vaxtımda hazırladım. Şəxsi layihədir”

“Gənclərə demək istəyirəm ki, ölkədəki və ya cəmiyyətdəki vəziyyətə görə ruhdan düşməsinlər və gələcəyə ümidlə baxsınlar”

“Bu texnologiya dünya sənayesində ciddi dəyişikliklərə səbəb olacaq”

HafizTimes.com-un növbəti müsahibi gənc yaşlarında dünyada məşhur olan azərbaycanlı dizayner Samir Sadıxovdur.

Məlumat üçün bildirək ki, S.Sadıxov 1990-ci ildə Gəncədə ziyalı ailəsində dünyaya göz açıb. Anası həkim, atası isə mühəndisdir. Gəncədə Azərbaycan – Türk liseyində orta təhsil alıb. İtaliyanin Turin şəhərində olan Istituto Europeo di Design – Nəqliyyat dizaynı fakültəsində bakalavr təhsili alıb. Almaniyanın Pforzheim Universitetində Nəqliyyat dizaynı fakültəsində isə magistr təhsili alıb. 

Sadıxov Azərbaycanın ilk peşəkar maşın dizayneridir. O, 2011-ci ildə Ferrari World Design Contest dizayn müsabiqəsində ikinci yeri tutan Ferrari Xezri Competizione Edition layihəsi ilə məşhur olub. Gənc yaşında bir çox uğura imza atan azərbaycanlı dizanyer “Ferrari World Design Challenge 2014” müsabiqəsində qalib olmaqla məşhurluq qazanıb.

O, 30 dizayn məktəbi, 500 tələbə arasında bir neçə turu keçərək, ilk pilləyə yüksəlib. Bundan başqa, o, Cadillac C-Ville və XTS konseptlərini layihələşdirib. Eləcə də Rezvani Beast (“Heyvan”) markalı avtomobil də azərbaycanlı dizayner tərəfindən layihələşdirilib, həmin avtomobil Hankook Tyre Design Challenge 2014 müsabiqəsinin qalibi olub. Samir Sadıxov təxminən 6 ay ərzində dizayn üzərində işləyib. Azərbaycanlı gənc dizayner Red Dot Design Award-ın 4680 layihəsi sırasında “Luminary” və “Best of the Best” mükafatlarına layiq görülüb. 

Qeyd edək ki, Red Dot Design Award yer kürəsinin dizayn Mərkəzi olan Essene (Almaniya) şəhərində yerləşən Şimali Reyn-Vestfaliya İnstitutu (alm. Design Zentrum Nordhein Westfalen) tərəfindən təqdim edilən dizayn sahəsində nüfuzlu mükafatdır. Mükafatlanmış işlər, Essendə Red Dot dizayn muzeyində sərgilənir. Bu muzey müasir dizaynın nailiyyətlərinin nəhəng toplusudur. Samir Sadıxov hazırda dünyanın çox nüfuzlu avtomobil şirkətində dizayner olaraq çalışır. Bu yaxınlarda onun hazırladığı Rezvani Motors TANK dizaynı işıq üzü görüb. Çox qısa zamanda hər kəsin rəğbətini qazanıb.

-Necə oldu ki, siz avtomobil dizayneri olmaq qərarına gəldiniz? 

– Uşaqlıqdan avtomobillərə qarşı xüsusi marağım olub. Hər zaman avtomobil eskizləri çəkməyi sevirdim, lakin yoldaşlarımdan fərqli olaraq, var olan avtomobilləri çəkməyi sevmirdim, hələ də sevmirəm. Hər zaman istəyirdim ki, öz fantaziyamda olan yeni bir avtomobil çəkim. Orta məktəbdə oxuyarkən, belə bir məşğuliyyətin, peşəkar səviyyədə etməyin mükün olduğunu öyrəndim və o gündən qərarım dəyişmədi. Nəhayət, avtomobil dizayneri oldum.

-Hazırkı işinizlə bağlı məlumat almaq istərdik.

-Hazırda dünya nəhəngi olan, Cənubi Koreyadakı “Hyundai” qrupuna məxsus olan “Genesis” brendində dizayner olaraq çalışıram.

“Bu isə şəxsi layihədir. Ticarət məqsədi daşımır. 70-ci illərdəki AutoMecca şirkətinin istehsal etdiyi “BrubakerBox” modelinin yeni versiyasını hazırladım. Evdə olan zaman, boş vaxtımda! Qeyd edim ki, hazırda yaşadığım ölkədə karantin rejimindəyik”.

– Sizcə, peşəkar avtomobil dizayneri necə olmalıdır? Bunun üçün nələr tələb olunur?

– Avtomobil dizayneri olmaq üçün əsas iki şərt vacibdir. Dizayn etmək üçün xəyal gücü və rəssamlıq qabiliyyəti önəmlidir. Çünki xəyalınızda təsəvvür etdiyiniz dizaynı canlandırmağın ən ideal və tez üsulu onu yaxşı çəkməkdir. Dizayner olmaq üçün bu çox vacibdir. Şirkətlər və universitetlər adətən işə qəbul prosessində birinci bu xüsusiyyətlərlə önəm verirlər. Dizayn ideyalarının yenilikçiliyi və dizaynların necə təsvir olunduğuna diqqət yetirirlər. Əsas rəqabət də bunun üzərində gedir.

-Gündəlik iş rejiminiz necədir? 

– Standart iş rejimi ilə çalışırıq. Həftədə 5 gün işləyirik. Əsas iş rejimi layihə üzərində olur. Əgər konsept bir modelin üzərində işləyiriksə, proses 1 il çəkir. Əgər istehsala gedəcək seriya avtomobilidirsə, 2 – 3 il çəkir. Gündəlik işimiz isə avtomobilin dizayn prosesi ilə bağlıdır. Bəzən yeni avtomobil üzərində eskizlər, bəzən 3D formatlə layihələr hazırlayırıq, bəzən isə hansısa modelin detallarını yenidən dizayn edirik.

Avtomobil insanlıq tarixinin ən vacib kəşflərindən biridir. Həyatımızı asanlaşdıran, bizi bir-birimizə tez və rahat qovuşduran vasitədir.

-Dünyada ən çox hansı avtomobillərə təlabat var?

– Hazırda ən əsas təlabat SUV ve Crossover seqmentində olan avtomobillərədir və ikinci tələb olunan isə ekonomik kompakt avtomobillərdir.

-Avtomobil istehsalı o qədər də asan başa gəlmir. Ən çətin proses nədən ibarətdir?

– Avtomobilin ən çətin hissəsi onun monokokunun ve şassisinin hazırlanmasıdır. Sonra isə ona uygun olan mühərrik ve transmissiya sisteminin hazırlanmasıdır.

– Gələcək avtomobil dizaynlarını necə təsəvvür edirsiniz? 

– Avtomobil dizaynı heç vaxt inqilaba uğramayıb, hər şey təkamül olub, inkişaf edib və yeni formalara sahib olub. Düşünürəm ki, gələcəkdə də avtomobillər texnologiyaya uyğun dizaynlara sahib olacaq. Dizayndakı ən çox dəyişikliklərin səbəbi, texnologiya və yeni çıxan qanunlardır. Bunların işimizə təsiri çox olur.

-Dizayner olmaq üçün fitri istedad lazımdır, yoxsa ağıl?

– İstedad 20 faiz, çalışmaq və zəhmət isə 80 faiz…

-Siz hansı avtomobillərə üstünlük verirsiniz?

– Praktik, əlverişli, ekonomik və sürətli avtomobilə daha çox üstünlük verirəm. Bunları özündə birləşdirən modellər mənim üçün daha məqsədəuyğundur.

-Artıq dünyada özü idarə olunan avtomobillərin dövrü başlayır. 

– Avtonom avtomobiller qaçınılmaz və üzümüzə doğru gələn inqilabi texnologiyadır və bu texnologiya dünya sənayesində ciddi dəyişikliklərə səbəb olacaq. Buna uyğunlaşmalıyıq, yoxsa geridə qalacağıq.

-Azərbaycana gəlirsinizmi? Çalışdığınız yerdə ölkəmizə qarşı insanların münasibəti necədir?

– Təəssüf ki, işlərimə görə Azərbaycanda gec-gec gəlirəm. Gələndə isə maksimum ailəm və sevdiklərimlə vaxt keçirməyə çalışıram. İş yerimdə tək azərbaycanlı olduğum üçün maraq pozitivdir və çalışıram ki, ölkəmizi yaxşı təmsil edim.

-Azərbaycanda iş qurmaq istərdinizmi? Bu istiqamətdə planlarınız nədən ibarətdir? 

– Plandan əlavə xəyallarım və arzularım var. Bu sahədə planları reallaşdırmaq üçün hökumətimiz və iş adamları dəstək olmalıdırlar. Uğurlu iş ortaya qoymaq üçün ciddi investisiya və plan lazımdır.

-Sonda gənclərə nələri məsləhət görərdiniz?

-Gənclərə ən əsas məsləhətim budur ki, dayanmadan öz üzərlərində çalışsınlar, xəyallarının ardınca getmək üçün özləri özlərini motivasiya edib, bütün maneələrə üz döndərib onlara qarşı vuruşsunlar. Ölkədəki və ya cəmiyyətdəki vəziyyətə görə ruhdan düşməsinlər və gələcəyə ümidlə baxsınlar.

Ümidi isə reallaşdıracaq olan sadəcə özləri, zəhmət və cox çalışmalarıdır. Tək formula – çox çalışmaqdır.

Hafiz Əhmədov

HafizTimes.com

Oxuyun

Müsahibə

`Ailəsini qorumaq üçün bunu edib` – Mirzə Cəlilin Kanadadakı mühacir nəticəsi (EKSKLÜZİV-FOTOLAR)

Yayımlandı

da

Tərəfindən

“Bir ailə olmağımıza baxmayaraq, illərlə bir-birimizi tanımamışıq”

“Mirzə Cəlilin adını çəkməyə qorxublar”

“Babam xəstələri pulsuz müalicə edirdi”

“Kökümüzün Azərbaycandan olduğunu bilmək məni qürurlandırır”

Cəlil Məmmədquluzadə (Mirzə Cəlil) – Görkəmli dramaturq və yazıçı, publisist, ictimai xadim,  Azərbaycanın dövlət müstəqilliyi, milli istiqlalı uğrunda mübarizənin ön cərgəsində duran ziyalı.  “Molla Nəsrəddin” ədəbi məktəbinin banisi və ideya rəhbəri. Azərbaycanda, eləcə də Yaxın Şərqdə satirik jurnalistikanın əsasını qoyub. Ana dilinin saflığı uğrunda mübarizə apar Mirzə Cəlilin zəngin irsində azərbaycançılıq məfkurəsi  əsas yer tutub. Xаlqımızın mədəni gеriliyinə, dini хürаfаtа, mövhumata, cəhalətə, avamlığa, mürtəce çаrizm siyаsətinə qаrşı inаdlа mübаrizə аpаrıb, milli mədəniyyətin yüksəlməsi üçün mühüm xidmətlər göstərib. Ədibin “Ölülər”, “Anamın kitabı”, “Dəli yığıncağı” və s. pyesləri Azərbaycan dramaturgiyasının parlaq nümunələridir. 1907-ci ildə Həmidə xanım Cavanşirlə ailə həyatı qurub və oğlanları Midhət və Ənvər dünyaya gəlib. Böyük Vətən müharibəsi illərində həkim kimi ordu sıralarına çağırılan Mirzə Cəlilin oğlu Ənvər, sovet qoşunlarının tərkibində İrana gedib. Ənvər burada polyak qızı, onunla bir xəstəxanada işləyən tibb bacısı Zofya Bahrinovskaya ilə evlənib. Bu nikahdan övladları – Midhət, Nizhət, Teymur, İren Cavanşirlər dünyaya gəlib. O, heç vaxt İrandan Vətənə qayıtmayıb. Qeyd edək ki, bu il Cəlil Məmmədquluzadənin anadan olmasının 150 illiyi tamam olur.

HafizTimes.com Azərbaycan mətbuatı tarixində ilk dəfə olaraq Molla Nəsrəddin” ədəbi məktəbinin banisi, görkəmli ictimai xadim, maarifçi Cəlil Məmmədquluzadənin (Mirzə Cəlil) varislərinin  axtarışına çıxıb.  Mirzə Cəlilin nəvəsi Teymur Cavanşirinin Kanadaya mühacirət edən oğlu Şahin Cavanşiri eksklüziv olaraq HafizTimes.com-un suallarını cavablandırıb. O, müsahibə zamanı ailəsi ilə bağlı bir çox önəmli məqamdan söhbət açıb,  Azərbaycan haqqında fikirlərini ifadə edib və ailə üzvlərinin fotolardan ibarət daha bir şəxsi arxivini təqdim edib. Qeyd edək ki, Mirzə Cəlilin Polşada yaşayan varisləri Martin Cavanşiri və oğlu Przemysłavı, İralandiyada mühacir həyatı yaşayan nəticəsi Ramin Cavanşirini də illər sonra Azərbaycan mətbuatı tarixində ilk dəfə olaraq HafizTimes.com tapıb, ailə kökləri ilə tanış edib və eksklüziv müsahibələr götürüb.

Cəlil Məmmədquluzadənin Kanadada mühacir həyatı yaşayan nəticəsi Şahin Cavanşiri HafizTimes.com-a danışır:

-Azərbaycan xalqının ailəmə olan sevgisini çox yüksək qiymətləndirirəm. Bu sevgi heç vaxt ailəm üçün mənfəətə çevrilməyib. Hər zaman gözəl sözlər kimi yaddaşlarda qalacaq. Biz heç vaxt Azərbaycanda yaşamamışıq. Buna görə də kitablarda ailəmiz haqqında nələr yazıldığını təəssüf ki, bilmirik: Həmidə xanımın taleyi necə oldu? Biz onun haqqında heç nə bilmirik. Onların adına muzey varmı? Bakıda qohumlarımız yaşayırmı? Ailəmizlə qürur duyuruq. Amma əlaqələrimizin kəsildiyinə görə çox kədərlənirik.

-Mən İranın Tehran şəhərində sevgi dolu bir ailədə dünyaya göz açdım, böyüdüm. İranda orta məktəbdə təhsil aldım. Daha sonra Kanadaya köçdüm. 10 ilə yaxındır ki, Kanadada yaşayıram. İT sahəsində çalışıram. Hazırda 43 yaşım var. Ümid edirəm ki, ailəmizin bütün üzvlərini bir gün görəcəyəm.

Təəssüf ki, Azərbaycana gedən əmim oğlu Martin Cavanşirini, oğlunu görmək şansım olmadı. Uşaq olanda Martini görmüşdüm.

(Ailəmiz: Atam Teymur Cavanşiri, anam Nəsirin, mən və qardaşım)

Biz bilirik ki, Mirzə Cəlilin həyatı heç də rahat keçməyib. Bundan sonra oğlu Ənvər İrana köçdü. Və ailəsini qorumağa çalışdı. Mən hələ də bilmirəm ki, əmim oğlu Martin ora necə getdi? Bu bizim ailəmizin təhlükəsizliyinə təsir edə bilərdi…

Ailəmizdən təkcə bibimin yaşadığını bilirəm. Başqaları barədə məlumatlı deyiləm. Ailəmizdə heç vaxt Azərbaycan, türk dilində danışmırdılar. Buna görə də, biz Azərbaycan dilini bilmirik. O vaxtlar Azərbaycanla heç bir əlaqəmiz olmayıb. Hər yerdə Mirzə Cəlilin əleyhidarları çox olub. Buna görə də bir ailə olmağımıza baxmayaraq, bir-birimizi tanımamışıq. Diqqət çəkmək istəməmişik. Axı siz heç vaxt İranda yaşamayıbsınız…

(Atamla anamın toyu-1974. Neşat əri ilə birlikdə, İren, Zofia nənə, atam Teymur, anam Nəsrin, Elisabeth, Ənvər babam, Midhət əmi, Neşətin qızı Zərrin)

-Niyə Kanadaya köçdünüz?

-Kanadaya oxumaq, əsasən də işləmək üçün köçdüm. Qardaşım da Britaniyaya köçüb. İllərdir ki, bir-birimizdən ayrı düşmüşük…

Mirzə Cəlilin ailəsinin üzvü olduğuma görə qürur duyuram. Azərbaycandakı insanların onu sevdiyini bilirəm. Mirzə Cəlilin Azərbaycan ədəbiyyatında, mədəniyyətində mühüm rol oynadığı da bizə məlumdur. Hərdən beynimdə Mirzə Cəlillə bağlı çoxlu suallar yaranır. Əgər Mirzə Cəlili bu qədər çox sevirdinizsə niyə axı onun həyatı çox ağır keçib? Hətta İrandakı ailə üzvlərimiz Mirzə Cəlilin adını çəkməkdən belə qorxublar.

Artıq mən də uzun müddətdir ki, İrana getmirəm. Amma gələcəkdə ora yenidən baş çəkmək fikrim var. Hazırda İranda siyasi vəziyyət çox mürəkkəbdir. Bizim İranda qohumlarımız yaşayır. Yəqin ki, onları ziyarət etməyimiz də çətinləşəcək…

(Atam Teymur, mən və balaca qardaşım Barzinin əlində Mirzə Cəlilin şəkili var)

-Cəlil Məmmədquluzadə sizin üçün kimdir?

-Mirzə Cəlil xürafat-cəhalətlə mübarizə aparmaq üçün canını fəda edən cəsur bir insan idi. Mən onun kimi cəsarətli deyiləm. Siyasətlə də məşğul olmuram. Ailəmizdə Mirzə Cəlilin yolunu davam etdirən birini tanımıram.

-Babanız Ənvər Cavanşirini (Mirzə Cəlilin oğlu) heç görmüsünüz? Onu necə xatırlayırsınız? Azərbaycan, ailəsi barədə sizə nə danışırdı?

-Bəli mən onu gördüm, çox bacarıqlı və mehriban bir həkim idi. Babam İranın şimalında bir çox xəstələri pulsuz sağaldıb, onlara kömək edib. Həmin xəstələrin ödəməyə pulları da yox idi. Oradakı insanlar babama inanırdılar və onu çox sevirdilər. Babam Azərbaycandakı ailəsi haqqında bizə heç danışmadı. Atam isə bizə dedi ki, o, ailəsini qorumaq hər şeyi gizli saxlayıb…

(Atam Teymurun toyu-1974. Mirzə Cəlilin oğlu Ənvər babam, anam Nəsrin, atam Teymur, Zofia nənəm)

-Atanız Teymur Cavanşiri, ananız Nəsrin xanımla bağlı bilmək istərik.

-Atam çox illər öncə qəzada həyatını itirdi. Anam Nəsrin isə Britaniyada qardaşımla yaşayır. Bu barədə qardaşımla müsahibənizdə geniş məlumat veriləcək.

-Azərbaycan haqqında fikirlərinizi bilmək istərik. Ailənizin Azərbaycan əsilli olduğunu nə vaxt öyrəndiniz?

-Eşitmişəm ki, Azərbaycan qonaqpərvər insanların yaşadığı gözəl bir ölkədir.  Əlbəttə ki, Bakını, Azərbaycanı çox görmək istəyərəm. Ailəmizin Azərbaycan əsilli olduğunu uşaq ikən öyrənmişdim.

Mən Azərbaycan xalqını sevirəm. Onların böyük bir hissəsi İranda yaşayır. Kökümüzün Azərbaycandan olduğunu bilmək məni qürurlandırır. Belə bir qanı daşıdığıma görə, başqa ölkələrdən olan insanlarla da daha yaxşı əlaqələr  qura bilirəm.

-Siz niyə Azərbaycana dəvət edilmədiniz?

-Bu, mənim də sualımdır. Cavabını bilmirəm. İstərdim ki, siz və ya oxucularınız mənim üçün bu suala cavab verəsiniz.

Bizi illər sonra məhz siz axtarıb tapdınız. Buna görə sizə təşəkkür edirik. Sizin göndərdiyiniz ilk mesajınız bizə çox təsir etmişdi. Ailəmizin digər üzvləri ilə 30 ildən sonra yenidən əlaqə saxlamağımıza vasitəçi oldunuz. Biz bunu heç vaxt unutmarıq. (Ünvanları, telefon nömrələrini göndərdik)

(Ənvər babamın evinin önü. Onun kiçik qızı İren, Zofia nənəm, Ənvər baba, atam Teymur və Martin)

-Azərbaycana səfər etmək istərsinizmi?

-Azərbaycan mənə çox maraqlıdır. Ümid edirəm ki, nə vaxtsa bu ölkənin gözəlliklərini görmək şansına sahib olacağam.

-Mirzə Cəlilin Polşadakı varisləri Martin Cavanşiri və oğlu Przemysłav ilə EKSKLÜZİV MÜSAHİBƏ-ni BURADAN oxuya bilərsiniz.

-Mirzə Cəlilin İralandiyadakı varisi Ramin Cavanşiri ilə EKSKLÜZİV MÜSAHİBƏ-ni BURADAN oxuya bilərsiniz.

Davamı olacaq…

HafizTimes.com

Hafiz Əhmədov                                                                    

Oxuyun

Müsahibə

`Nənəmgili zirzəmidən də qovurdular`– Hacı Zeynalabidinin rus nəticəsi: “Həmin kasetdə hər şeyi danışıb” (EKSKLÜZİV+SƏNƏDLƏR)

Yayımlandı

da

Tərəfindən

Nənəmin səs yazısı olan kaseti verdiyimiz şəxs qəflətən helikopter qəzasında həlak oldu”

“Tağıyev restoran sahibinə deyib ki, bu illər ərzində hər bir azərbaycanlı orada pulsuz, onun hesabına yemək yeyə bilər. Bunu nənəm Sara xanım mənə danışıb”

Nənəm öz oğlu Oleqi Sankt-Peterburqda yaşayan qohumumuza vermişdi. Mənim atam isə internatda böyüyüb

“Nənəmə kömək etməyə yox, muzey eksponatı kimi baxmağa gəlirdilər”

Məşhur azərbaycanlı milyonçu, mesenat, Rusiya İmperiyasının Həqiqi Dövlət Müşaviri, müsəlman Şərqində ilk qızlar məktəbinin yaradıcısı Hacı Zeynalabidin Tağıyevin nəticələrinin bir qismi hazırda Rusiyada yaşayırlar. 

HafizTimes.com Hacı Zeynalabidin Tağıyevin qızı Sara Tağıyeva-Sarayevanın Moskvada yaşayan nəvəsi Dmitri Sarayev ilə həmsöhbət olub. Dmitri Sarayev babası Hacı Zeynalabidin Tağıyevlə bağlı illərdir ki, gizli qalmış bir çox məqamlara aydınlıq gətirib, ailəsinin fotolarını, nənəsi Sara Tağıyevanın əlyazmalarını da HafizTimes.com-a təqdim edib:

Qeyd edək ki, Hacı Zeynalabidin Tağıyevin qızı Sara xanımın hazırda Rusiyada Oleq və Lev Nikolayeviç Sarayev adlı iki oğlu yaşayır. Bizim müsahibimiz Dimitri Sarayev Lev Sarayevin oğludur. Uzun müddət Bakıda nənəsi Sara xanımın yanında yaşayıb.

(Sağdakı 2-ci xanım Vəli Məmmədovun həyat yoldaşı Xalidə Əlizadədir)

– Azərbaycan dilində danışa bilirsinizmi?

– Bəli. Amma çox da yaxşı danışa bilmirəm. Elə sözlər var ki, başa düşmürəm.

– Tağıyevin nəvələri – Sara Tağıyevanın oğulları indi harada yaşayırlar, nə ilə məşğuldurlar?

– Nənəm Sara Xanımın bir oğlu Oleq hazırda Sankt-Peterburqda yaşayır, Elmlər Akademiyasında çalışır. Digər oğlu, yəni mənim atam Lev isə hazırda Ryazan şəhərində yaşayır. Atam indi yaşlanıb, pensiya alır. Mənim Oleq adlı qardaşım isə 5 il bundan öncə rəhmətə edib.

(Sara Tağıyeva və övladları: Oleq, Lev Sarayev)

– Onlar Azərbaycana gəlmək istəyirlərmi?

– Əmim Oleq Nikolayeviçin fikirini bilmirəm. Amma atam yaşlandığı üçün ona uzaq yol getmək çətindir. Mən özüm Bakıda anadan olmuşam. 1993-cü ildə Bakıdan çıxmışam. Həmin vaxt atam Bakıda yaşayırdı. Amma Oleq əmim hələ uşaqlıqdan Sankt-Peterburqda yaşayıb.

– Hazırda hansı işlə məşğulsunuz?

– Mən podpolkovnikəm, uzun müddət polis orqanında çalışmışam, indi isə pensiyaya çıxmışam.

– Nənəniz Sara xanım necə bir həyat yaşayırdı?

– Biz nənəmin evinin qonşuluğundakı binada qalırdıq. Nənəm həmişə tək qalmaq istəyirdi. Həmişə yanına gəlirdim, soruşurdum ki, ay nənə, nə lazımdır? Nənəm həmin vaxt zəif eşidirdi, görə bilmirdi. Deyirdi ki, “Dima, bir bax gör, evin polunu necə yumuşam? Gör, hər yer təmizdirmi?” Deyirdi ki, “Dima, sən heç nə etmə, qonaq gəlmisən, heç nəyə əl vurma, özüm hər şeyi edəcəyəm”.

Nənəm öz atasını çox sevirdi. Bütün həyatını atasına həsr etmişdi. Həmişə bizə atasından danışırdı. Deyirdi ki, atası öz millətini həddindən artıq çox sevirdi. Dostumun bir maqnitofonu vardı. Nənəmin yanına gələndə ona çoxlu suallar verib, səsini kasetə yazırdım. Amma o kaset indi itib. Atam o vaxt həmin kaseti Vəli Məmmədova verib. Nənəm hər şeyi danışmışdı. Daha sonra Vəli Məmmədovun helikopter qəzasında faciəvi şəkildə həlak olduğunu eşitdik. Təəssüf ki, bu gün həmin kaset yoxa çıxıb.  Qeyd edim ki, Vəli Məmmədov atamla tez-tez gürüşərdi. O, nənəmə də hər zaman kömək edərdi.

Məndə indi də nənəmin babama yazdığı məktubları qalıb. Fikrim vardı ki, həmin məktubları kompüterdə çapdan çıxarım. Çünki, nənəmin yazdığı sözlərin çoxunu başa düşmürəm.

Məndən öncə qardaşım nənəmlə birlikdə qalırdı. Mən isə həmin vaxt ata-anamla birlikdə Culfada yaşayırdıq. Qardaşım birinci sinifdə oxuyanda mən də Bakıda Yasamal rayonunda nənəmin yanında qalmağa başladım.

– Siz azərbaycanlısınızmı?

– Xeyr. Mən rusam. Mənim nənəmin ikinci həyat yoldaşı Nikolay Sarayev rus olub. Ona görə bizim milliyətimiz rusdur.

– Hacı Zeynalabidin Tağıyev haqqında nələr bilirsiniz?

– Yəqin, Hacı Zeynalabidin Tağıyevin Almaniyada restorana getməsi məsələsindən xəbərdarsınız. Bu, tamamilə doğrudur. Nənəm mənə danışırdı ki, Tağıyev Birinci Dünya Müharibəsi vaxtı Almaniyada olub. O vaxt Kayzer belə bir əmir vermişdi ki, rus təbəələrinin banklarda olan hesabları bağlansın. Amma Tağıyevin bankdakı hesabını açmışdılar ki, o, Almaniyadan çıxa bilsin.

Tağıyev Almaniyada olanda restorana gedib. Xidmətçi ona yemək verməyib. Amma axşam restoranın sahibinə məlum olur ki, ora kim gəlibmiş. Onu yenidən restorana dəvət edib, böyük bir süfrə açıb. Axşam yeməyi zamanı Tağıyev soruşub ki, bir günlük bu stolun qiyməti nə qədərdir? Bir həftəlik, bir aylıq və bir illik nə qədərdir? On illik qiyməti nə qədərdir? Qiyməti biləndən sonra Tağıyev restoran sahibinə deyib ki, bu illər ərzində hər bir azərbaycanlı orada pulsuz, onun hesabına yemək yeyə bilər.

Nənəm danışırdı ki, bir aralar bazarda balıq olmayıb. Hamı Tağıyevin yanına gəlib ki, balıq yoxdur. Tağıyev dənizin kənarına gedərək, deyib ki, mənə bir balıq tutun. Barmağındakı üzüyü çıxarı, balığın quyruğuna bağlayıb və dənizə buraxıb. Deyib ki, kim bu balığı tutsa, üzük də onun olacaq.

Nənəm hətta danışırdı ki, Tağıyev ilk dəfə olaraq Bakıya pomidor gətirdib və dadına baxıb. İndi Şollar suyunu Bakıda camaata butulkalarda satırlar. Amma Tağıyev Şollar suyunu o vaxt Bakıya çəkmişdi ki, camaat o suyu pulsuz içsin.

Nənəm deyirdi ki, o vaxt çar Aleksandr Bakıda vağzalda Tağıyevlə görüşərkən Hacı papağını çıxarmayıb…

– Sara xanımın həyat yoldaşı ilə bağlı danışaq…

– Babamız Nikolay o vaxt Leninqradda zavodda mühasib işləyirmiş. Nənəmlə orada tanış olublar. Babam müharibədə həlak olub.

– Nənəniz Sara xanımın övladlarını atıb, Bakıya gəldiyini deyirlər. Bu, nə dərəcədə doğrudur?

– Nənəm öz oğlu Oleqi Sankt-Peterburqda yaşayan qohumumuza vermişdi. Mənim atam isə internatda böyüyüb. O vaxtlar çox çətin idi. Nənəm işləmək istəyirdi. Amma onu Bakıda hər yerdən qovurdular. Atam həmişə bizə danışırdı ki, bir müddət Bakıda zirzəmidə yaşayıb. Nənəmgili hətta zirzəmidən də qovurmuşlar. Buna görə nənəm elə bir addım atmışdı. Nənəmə ömrünün sonlarına yaxın Nərimanov prospektində ev vermişdilər. O, elə həmin evdə də yaşayırdı..

– Bəs atanız, əminiz öz anaları Sara xanımdan inciməmişdilər?

– Nənəm həmişə uşaqlarına məktublar yazırdı. Həmin məktubları oxuyanda nənəmin öz övladlarına nə dərəcədə bağlı olduğunu görmək olur. Hətta nənəm ömrünün son günlərində Respublika Xəstəxanasının reanimasiya şöbəsində yatırdı. Onun otağında qalmaq üçün mənə və atama icazə vermişdilər, növbə ilə orada qalırdıq. Nənəm orada da dünyasını dəyişdi. Həmin gecə atam onun yanında qalmışdı. Nənəm dünyasın dəyişən vaxt heç nə deməyib.

– Bəs siz niyə Azərbaycanı tərk etdiniz?

– Həmin vaxt qardaşım Arxangelskdə işləyirdi. Mən isə Neft Daşlarında çalışırdım. Qardaşım onunla getməyi təklif elədi, mən də fikirləşmədən ona qoşuldum.

– Bəs atanız, əminiz nəyə görə getdilər?

– Bu, çox çətin sualdır. Evimiz də var idi. Ayaz Mütəllibovun vaxtında bizə Mərdəkanda bağ da vermişdilər. Elçibəy hakimiyyətə gələndə siyasət bir az başqa cür oldu.

– Elçibəyə görə Azərbaycandan getdilər?

– Çox çətin sualdır. Cavab verə bilmirəm.

– Siyasəti bəyənmədiniz?

– Bəli. Deyək ki, səbəb budur. Məndə bu sualın cavabı var. Amma demirəm.

– Bəlkə sizi incidirdilər?

– Mən Bakıda anadan olmuşam. Bizi kimsə incitməyib.

– Deyirlər ki, o vaxt nənəniz dilənçilik edirdi, çörək pulu yox idi… Doğrudurmu?

– Mən o vaxtlar Neft Daşlarında işləyirdim, yaxşı pul qazanırdım. Nənəmin yanına gəlirdim. Həmişə mənə deyirdi ki, “Dima bir, yoxsa iki manat pul verim?” Deyirdim ki, “Nənə, mənə pul lazım deyil. Əsas sənə pul lazımdırsa, de, istədiyin qədər verim…” Nənəm belə bir insan idi.

– Nə yaxşı, Azərbaycan dilini unutmamısınız?

– Mən Moksavada yaşayıram. Burada isə xeyli azərbaycanlı var. Axı mən Azərbaycan dilini necə unuda bilərəm? Həmişə azərbaycanlılarla söhbət edirəm. Biz Azərbaycan Tarix Muzeyinin 90 illiyində Bakıya gəlmişdik. Babamın bütün qohumlarını ilə görüşdük. Amma indi elə də yaxın əlaqələrimiz yoxdur.

– Bakı üçün darıxırsınız?

– Əlbəttə. Mən Bakıda anadan olmuşam, böyümüşəm, əsgərliyə getmişəm… İndi isə 53 yaşım var.

– Bakıdan getdiyinizə görə peşmansınızmı?

– Əlbəttə, peşman oluram. Belə gətirdi ki, çıxıb getdik. Amma ora qayıtmaq istəyirəm.

(Lev Sarayevin oğlanları: Dmitriy və Oleq)

– Nənəniz Sara xanımın acınacaqlı vəziyyətdə ömür sürməsi ilə bağlı mətbuatda qeyd olunan iddialara münasibətiniz necədir?

-80-ci illərin sonu 90-cı illərin əvvəlində nənəmin yanına çox adam gəlirdi. Lakin onların əksəriyyəti nənəmə muzey eksponatı kimi baxmağa gəlirdilər. Əslində isə kömək edənlər çox az idi. Yaxşı xatırlayıram ki, Vəli Məmmədov ona həmişə kömək edirdi. İndi isə əlbəttə bəziləri çox söz danışa bilərlər… Nənəmin xasiyyətinə bələd olduğum üçün deyə bilərəm ki, tələbələrin gəlib onu çimdirmələri ilə bağlı mətbuatda yazılanlar sadəcə olaraq cəfəngiyyatdır.

Bəli, xatırlayıram ki, texniki bir məktəbdən ona yemək gətirdilər. Amma 6 il boyu belə davam etmədi. Onun həqiqətən də buna ehtiyacı yox idi. Sadəcə olaraq atasının xidmətlərinə görə ona qayğı göstərilməsini xoş qarşılayırdı. Həyatının son günlərində Respublika xəstəxanasında reanimasiya şöbəsində yatarkən də atam daim onun yanında olub. Mən atamla birlikdə növbə ilə onun yanında qalırdıq. Bir dəfə o qolundakı iynəni çıxarıb atdı və heç kimə icazə vermədi. Yalnız biz onun əlini tutanda sakitləşdi…

Hafiz Əhmədov

HafizTimes.com

Vəli Məmmədovun həyat yoldaşı Xalidə Əlizadənin Sara Tağıyeva ilə bağlı HafizTimes.com-a açıqlamasını BURADAN oxuya bilərsiniz: Qarakənd faciəsi noyabr ayının 20-də olmuşdu. Ayın 23-cü biz eşitdik ki, Vəli də vertolyotda olub və həlak olub. Bir həftə sonra Sara Tağıyeva mənə zəng edib dedi ki, Xalidə, mən ikinci atamı da itirdim, bundan sonra çətin ki, yaşayım. Vəlidən bir həfətə sonra Sara Tağıyeva da dünyasını dəyişdi…”.

Oxuyun

Trend yazılar